BAGJA NU JADI KOLOT
Heueuh ari geus
rerempo mah kieu..leumpang ge teu kebat kawas baheula keur ngora, awak cuet
kahareup….takrah-tokroh mangsa ngamimitian leumpang di sisi jalan gede…buuk
geus cetuk huis…cirining umur geus tunggang gunung…sapaparat jalan nikreuh bari
rarat-reret nenjo jungkiring toko-toko jeung nu daragang sisi jalan…teu suda
jalan gede pinuh kurapa rupa kandaraan kayaning mobil jeng motor sing selebrut
…maju muru tujuan sewang sewangan….
Sakapeung
kuring ngarandeg…narik napas nu renghap ranjug…heueuh teu kawas baheula keur
ngora..leumpang jauh ge taya kacape….gap kana kamera photo nu geus lawas
marengan mun kuring ngalalana…tara elat dina tas atawa di kongkoyangkeun dina
beuheung saperti ayeuna…
Sanggeus dirasa
ambekan rada daria, kuring nuluykeun lumaku…mapay sisi jalan badag nu rapih tur
resik di tata ku pamarentah bagean tata kota.
Anjog ka
peuntaseun hiji wangunan kantor anu julug jangkung…reug kuring eureun bari
ngatur ambekan nu renghap ranjug…kamera dicabak tuluy diangkat dideukeutkeun
kana mata, liang lensa di antelkeun kana mata Beulah katuhu…tina sela sela
lensa kamera, kuring bisa nenjo wangunan peuntaseun jalan…nu julug jangkung
ngajungkiring tanding langit di tengah wangunan kaciri tulisan aksara meni
badag “CV DOA SEPUH”, jeklek.! Kuring nyerek gambar wangunan kantor…teu kungsi
lila aya mobil sedan pulas bulao laju mengkol ka eta wangunan kantor…reg
eureun…jrut supirna turun…koreleng ka hareupeun mobil tuluy si supir ngoreleng
ka kencaeun mobil… muka panto…jrut..nu dina jero mobil turun…katenjo..jajaka
gandang make setelan jas hideung di papas kameja bodas lengkep jeung
dasina….song ngasongkeun tas nu langsung di tarima ku si supir…
Jeklek…kuring
mencet tombol kamera jang nyerek gambar eta jajaka….cag kamera di ecagkeun
ngagantung dina dada…gelenyu kuring imut…tuluy ngarenghap rada panjang…
Sanggeus dirasa
cukup nitenan sakuriling wawangunan kuring neruskeun lumaku…mapay-mapay sisi
jalan…nu beuki rame kawantu maju ka beurang.
Lebah parapatan
laju ngenca… kusiwel kuring ngaluarkeun udud tina saku calana...tuluy di
sundut…haseupna meni nyerebung maturan lenghoyna leumpang mapay-mapay sisi
jalan.
Satengahna udud
beak kaduruk lalampahan anjog peuntaseun hiji wanguna Rumah Makan nu kawilang
gede…katenjo semah-semahna kaluar asup piligenti…aya nu saukur istirahat bari
nginum kopi, aya wae anu mumuluk meureun kaciri sibuk sewang-sewangan.
Dina paciweuhna
semah jeung pelayan eta rumah makan kaciri aya nu cakah cikih ngatur para
pelayan jeung pagawe…tangtungan lalaki ngora keneh…kaciri parigel dina
ngokolakeun eta rumah makan…
Kuring
imut….kelepus udud nu tinggal satengah di seuseup rada jero….kuntungna di
alungkeun tuluy di tincak…serebung haseupna rada kandel mulek kaluar tina
irung…gap kana kamera…diangrogkeun kana mata Beulah kenca…kokangna di tarik
kana on..jeklek..wawangunan di cerek gambarna…lensa di atur…jeklek si lalaki nu
keur paciweuh ngatur laku di cerek gambarna…jeklek kokangna dibalikeun kana
off..sok di tunda sina ngagawing sa asalna dina dada
Kuring tanggah
nenjo langit…panon poe geus ampir dina luhureun sirah…gelenyu kuring
imut..ngajak seuri ka langit..ka mega..ka panon poe..nu marengan lalampahan poe
eta…
Laju neruskeun
lalampahan rek muru masjid gede dipuseur kota nu teu jauh ti dinya…
Basa sora adzan
eces ka denge, kuring geus ngalenghoy hareupeun masjid….
Teu kungsi lila
aya sedan warna bulao nu tadi isuk kungsi ka tempo… eureun di palataran parkir
hareupeun masjid, supirna turun, geuwat muka panto tukang beulah
katuhu….Jrut lalaki ngora turun tina
mobil…eces eta lalaki nu tadi hareupeun wawangunan julug jangkung tea, supir
geuwat muka panto tukang beulah kenca…jrut…aya lalaki deui turun tina mobil…di
sidik-sidik sing horeng lalaki nu tadi cakah cikih di rumah makan tea…
Bareng duanana
ngareret ka kuring…gelenyu imut…kuring imut…
Gap kana
kamera…tuluy di antelkeun kana mata…tina sela-sela lensa kuring nempo duanana
rek kebat ngadeukeutan kuring….jeklek
gambarna di cerek.
Duanana anjog
hareupeun kuring….
Song
ngarasongkeun leungeung ngajak sasalaman…
Kukuring di
tampa…sakali sewang…sun tangan ka kuring…
“Apa !” Ceuk
duanana meh bareng…
“Syukur…sanajan
sakumaha sibuk..hidep masih bisa berjamaah jeung Apa, di ieu masjid…nam, urang
shalat heula” ceuk kuring bari ngaleng dua jajaka…nu taya lian anak teges.
Bagja kuring nu
jadi kolot…nenjo anak teu poho kana kawajiban …sok sanajan sakumaha sibuk
gawe….tapi masih bisa berjamaah di masjid bareng jeung kuring nu jadi kolotna.
Tidak ada komentar:
Posting Komentar